تعليق مفاجئ من ابنة الخطيب بعد هجوم جماهير الأهلي

أعربت نور الخطيب، نجلة محمود الخطيب، رئيس النادي الأهلي، عن غضبها الشديد تجاه النقد الذي طال والده في الفترة الأخيرة.

وهاجمت جماهير النادي الأهلي، محمود الخطيب؛ بسبب تراجع النتائج في الفترة الأخيرة، وآخرها الخسارة أمام بيراميدز بثلاثية دون رد.

ترددت في الرد على الانتقادات

وكتب نور الخطيب عبر حسابه الرسمي على موقع التواصل الاجتماعي فيسبوك: "ترددت كتيرًا قبل ما اكتب أي حاجة علشان اتعودت اسكت وقت ما السكوت كان اصعب اختيار".

وأضافت: "مواقف و اختبارات كتير عدي بيهم محمود الخطيب اتعودنا نحترم اختلاف الناس اتعودنا نتجاوز عن إساءات كتير، واللي كان دايمًا بيهون علينا إن في الآخر ولا موقف ولا أزمة واحدة عدت إلا ربنا الحمد لله انصفه فيها و كبره و زوده و كرمنا معاه".

وتابعت: "ولا موقف دافع فيه عن نفسه ولا موقف سمح لحد حواليه يستنكر مواقف الناس و زعلها ولا مره ضعف ولا مره غلط و لا مره بر".

وشددت: "برغم إن دايمًا و في كل المواقف اللي عدت، اللي متقالش كان و مازال أكتر بكتير من أي حاجة اتقالت".

وواصلت: "المشكلة مبقتش كورة المشكلة بقت نفوس قاسية وظالمة وبتستسهل الغلط والظلم ونفوس مختلط عليها النقد والتجريح ونفوس بتخاف تقول كلمة حق و بتخاف من الناس من غير اعتبار لرب العالمين ال مطلع علي كل حاجة".

وأردفت: "المشكلة إن اللي زي محمود الخطيب قليلين مش ممكن يخسروا نفسهم ولا يغيروا طريقهم مهما اتسد، بس ربنا دايمًا بيوجدلهم طريق تلاقي فيه حد مش خايف يمشي عكس التيار، حد سوي يقول كلمة حق، حد يسند و حد يطبطب و حد يوقف دايرة الظلم والتعدي والتجني من غير دراية حقيقية".

سيقف التاريخ أمام محمود الخطيب

وأتمت: "واخيرًا كل يوم باجاوب علي نفس السؤال: ليه محمود الخطيب، ليه وازاي اتغيرت ملامحه ليه اتحمل جسمه و شالت روحه فوق طاقتها،ليه اخلاقه بتُختبر كل يوم في الوقت اللي كل حاجة فيه بقت مستباحة و كل كلمة و كل حُكم بقي بيطلع بسهولة حتي لو الواحد مش عارف أي حاجة، واكتشفت إن علشان هو يقدر يستحمل ويشيل شيلة بعدد سنين طويلة و مواقف كان ممكن تهد أي حد، اختار هو يثبت و يشيل و إن تناسي الجميع، في الآخر النادي الأهلي هايفضل الأعظم مهما حصل و مهما اتغيرت الاسامي وهايفضل محمود الخطيب شخصية يقف التاريخ عندها طول العمر".