أثار المهندس عدلي القيعي، رئيس لجنة التعاقدات السابق بـ النادي الأهلي، العديد من الملفات الشائكة المتعلقة بسوق الانتقالات، وسياسة التعاقدات، ودور الإدارة، خلال ظهوره الإعلامي الأخير.

وتطرق القيعي إلى كواليس صفقات لم تكتمل، وانتقادات طالت بعض الاختيارات الفنية، إلى جانب رؤيته لمفهوم البناء الصحيح داخل الأندية، مؤكدًا أن الضغوط الجماهيرية والإعلامية لا يجب أن تُغير من قناعات المسؤول إذا كان مقتنعًا بصحة قراره.

اقرأ أيضًا.. الأهلي يغير موقفه تجاه رحيل جراديشار إلى الدوري المجري

وتحدث القيعي عبر قناة "MBC Masr"، وقال: "طلبنا في الموسم الماضي التعاقد مع محمد بسام من سيراميكا، لكن الرد كان أنهم يريدون مصطفى شوبير مقابل الموافقة، وبالتالي لم تتم الصفقة".

وأضاف: "ليه دايمًا بنركز على صفقة أو اتنين ونقول بيراميدز خطفهم؟ في صفقات كتير بتتم ومحدش يعرف بيراميدز كان طرف فيها ولا لا، والزمالك نفسه كسب قدامي 3 أو 4 صفقات".

واستمر: "العبرة مش إنك تكسب الصفقة، العبرة إنك تبني صح، وأنا مقتنع إن اختياراتي كانت سليمة وقتها، حد يقولي هل اختياري لأشرف داري كان غلط؟ كل المعطيات كانت صح، لكن الإصابات لعبت دور".

وواصل: "حتى يحيى عطية الله، هو اللي ظلم نفسه بأخطاء شخصية كلفتنا بطولتين، ومش كل حاجة تتحسب على الإدارة".

وتابع: "من أكتر من خمس سنين وأنا بحذر إن الصفقات ما تتحولش لبطولات، البطولة الحقيقية هي الاستمرارية والبناء".

وزاد: "أنا ما زعلتش إن عودة الفاخوري ما جاش الأهلي، لأني أصلًا ما كنتش أعرف إنه قريب من الأهلي، وأنا متعمد ما أسألش عن الصفقات".

وأضاف: "لو سألت ومعلومة اتسربت هتحطني في موقف (يا ريتنا ما قولنا)، وحتى بعد العمر ده كله ليه أحط نفسي في الدائرة دي؟"

وشدد: "كنت أحيانًا أطلع من البرنامج الساعة واحدة الفجر، والناس تتفاجئ بخبر إني أنهيت صفقة، وكنت بخبي شغلي حتى عن ابني".

وتابع: "دايمًا بنختلف على لاعيبة وبنندم بعد كده، زي وليد أزارو، دلوقتي تتمنى لاعب يخلق 10 فرص ويضيع 7 ويسجل 3".

وزاد: "وسام أبو علي هو النسخة الأنضج والأكمل من أزارو، لكن هل تقدر تلاقي لاعب زيه كل يوم؟ وهل يقدر يحافظ على مستواه؟ المؤشرات بتقول نعم".

وواصل: "مكانش في حل غير بيع وسام، لأنك ما تقدرش تجبر لاعب يقعد غصب عنه، ولو غلست عليه مش هيقدملك حاجة".

ووجه القيعي رسالة إلى جماهير الأهلي: "الناس فاكرة إن ياسين منصور جاي يضخ فلوس بلا حساب، لكن قيمته الحقيقية في الإدارة والفكر الاقتصادي، مش في الدفع فقط".

واستمر: "لو دخلنا صفقة خارج المنطق المالي، الراجل مش هيتأخر، لكن لو الاعتماد على الفلوس بس، الأندية مش هتتطور".

وزاد: "أتمنى استمرار أحمد عبد القادر، لأنه موهبة كبيرة، ولو أدار نفسه صح كان هيبقى علامة في الكرة المصرية".

وأضاف: "أي لاعب أنا عشمان فيه مش حابب يروح الزمالك علشان ما ندخلش في نكايات جماهيرية ملهاش لازمة".

وتابع: "في ناس بتهاجم محمد هاني علشان تثبت إن رأيها القديم كان صح، وبتشوف السلبيات وتسيب الإيجابيات".

وواصل: "أي لاعب لعب للأهلي بإخلاص لازم أسانده، ده واجبي".

وأضاف: "أنا بتكلم من قلبي لمصلحة الأهلي، ولو اتفقتوا معايا هكون مبسوط، ولو اختلفتوا مش من حق حد يصادر رأيي".

واستمر: "اللي يخاف من كلام الناس عمره ما هيقول الحقيقة".

واختتم: "في ناس بتدعي إنها أهلاوية وبتهاجم لاعيبة مخلصة للنادي وبتعمل أزمات بدون سبب".